雖然呢度無咩好玩, 但呢度一般人中意睇既電視劇可以推介下, 可能你會更快習慣聽英文, 亦都同本地人多個話題.
喜劇類
two and a half men - 講一個單親爸帶住個本來七歲左右既小朋友, 因為離婚到去佢哥度寄住, 呢個爸係半個醫生來既, 但無人當佢係醫生, 佢哥係個唔駛做野但都勁有錢既作曲家, 一日到黑都係飲酒溝女既, 一個好辛苦做野但離婚分左半份身家無埋間屋既爸同個好好彩唔駛做又有錢既哥加埋個細路當然有笑料, 電視唔2邊個channel有做但係做到season 唔知9定幾, 由season 1 開始睇個小朋友係7-8歲, 係最近season佢已經係成年既靚仔(無錯套野拍左十年都有), 但個爛飲主角因為真人都變成咁既關係已經換左角色, 已經唔好睇, 你無野做、等食飯可以睇下. 而家係season break, 但你可以上網睇.
[2015按: 長過真情的十九幾個season終於收皮鳥.]
住、行
我係到步之前係已經上網搵左地方住, 係www.gumtree.com搵, 你揀番perth或者你自己所屬地區先慢慢睇, 你可以跟自己預算搵, 一般$100-$200(每週計). 我當時搵到既係唔駛錢的, 條件係要幫手打掃間屋, 當然其實只係一星期三幾個鐘, 其餘時間你可以照常返放工.
另外亦有朋友搵到免費住宿的, 主要條件都係你係佢唔係屋企既時候幫佢睇住小朋友, 照顧老人家之類. 其實唔難搵的, 據我所知一般香港人或者華人既分租房就好少會有呢的免費機會既, 而且會超多人迫埋一間屋. 而且如果間屋本身無一的傢俬電器既話你都要自己買, 因為大家都係住一陣走, 好少會買好多野係度.
由於當時搵到既呢個免費住宿係由一個本地鬼妹提供既, 而佢又係一個好中意周圍玩周圍識朋友既人, 所以佢都成日帶我去唔同朋友度玩, 識多好多朋友之餘, 你會好快就學到本地人做咩工, 點搵工, 而且有咩係佢地唔做既.
食
平食
聽聞呢度餐廳貴過東岸好多, 我未去過東岸, 但呢度一般餐廳係貴, 高級餐廳反而唔太貴, 食個麥當勞餐一般都係7-8蚊, 但近來多左好多麥當奴同hungry jacks等做$2 special, $2有個包, 好似$1.5 有細薯條麥樂雞同軟雪糕, 對比番呢度人搵既薪金來講其實呢度麥當奴平過香港.
[2015更新: 一個hungry jacks餐約8-10, 間中有優惠, whopper買一送一但只限單買包,買餐就無得送. KFC有$9.95九件雞(不知是否全部店), $20十件雞連兩個薯條(不在餐牌, 要特別問職員).]
hungry jacks 即係全球所有地方包括香港既burger king. 起初因為版權問題, 原本就有間賣漢堡的叫burger king, 所以遲來的burger king就要改名做hungry jacks 喇. whopper應該即係香港既華堡. 唔記得, 好耐無食過香港的, 香港的burger king係好食的, 幾年前食係好食, 呢度的burger king係唔好食的. 千祈唔好有任何期望.
本地生活
即係衣食住行玩啦.
先講玩
柏斯係完全無野玩既.
銀行開戶
又好多人唔知, 其實你可以到步前開戶既, 據我所以hsbc係唔得既, 而且hsbc係呢度唔係主流銀行, 係柏斯既分行係少到離奇, 一般人好少用既, 但當然有的野係hsbc先做到, 有的野都係hsbc較平, 但都有較貴, 如果你有咩問題可以睇佢個網站 www.hsbc.com.au
呢度一般銀行戶口都要俾月費既, 少量唔駛, 唔駛月費既通常係儲蓄戶口, 拎錢出黎要再過戶番去transaction 戶口, 或者你要每個月入錢落去(例如出糧)咁就會免月費.
[2015按: 而家大部份戶口都免月費, 但仍然請留意條件和最低存款要求.]
以我所知主要可以開戶又唔太煩又唔太貴既係westpac, 有種戶口係俾移民用, 你唔駛一定要移民來, 佢主要係俾未到步既人開左個戶口先, 咁你唔駛袋住堆cash穿州過省, 我唔知你地帶幾多錢過來, 但我來果時就帶左唔係好多所以更加唔想唔見既現金, 經馬來西亞再經星加坡咁訓左一晚機場先來到既... 現金係袋住上機落機同係機同訓. 如果我當時知道可以未到步先開戶口我一定會用.
電話卡
呢度既電話任何plan或者儲值卡都係打電話者俾錢的, 收電話者講幾耐都唔駛錢. 你可以開張零credit既電話卡, 你打唔到俾人, 但人地打到俾你的.
一個本地電話號碼係好有用的, 你可以寫定你份CV印定出黎, 唔駛來到再買卡又等佢activate然後打番落CV然後又再搵地方俾錢印, 呢個係朋友經歷. 你甚至可以搵定某些工, 搵地方住, 同埋出發前俾定你屋企人, 總之你會一到步就有個本地電話號碼係方便好多的. 唔知你本身電話打唔打到長途, 但柏斯呢邊好多野都唔方便而且真係可以四野無人, 唔好諗住周圍有人俾你問野, 唔好諗住周圍有電話亭, 唔好諗住機場就乜都有唔好諗住24小時, 呢度個機場落後過泰國. 你想話問下公共交通既話一般本地人都係唔知的, 因為一般人都係自己渣車. 你有電話既話睇下係唔係3G, 2G既話基本上接收係好差的, 3G係OK, 如果你係香港買到next G 電話的話係收得最好的(但我諗買唔到), 呢度好多地方就算市區3G都係收得好差的, 要用next g先得, 尤其如果你會住既屋係金屬屋頂或者係郊區都好大機會會收得差, 另外無車係真係唔方便的.
電話卡你可以搵你已經到左既朋友買, 如果你無朋友, 可以私下搵我, 我唔會日日去但可以出開去的時候幫你買, 請預留多少少時間同埋話我知你幾時到步或者幾時要, 電話卡費同郵費當然係客下自己俾番, 我順路的可以幫你買telstra或者optus, 如果你真係想要vodafone都可以幫你買既, vodafone同3已經合併左做同一間公司, telstra收得最好, 如果你住得僻甚至去做農工, 一般都要telstra先收到, 一好多地方連telstra都收唔到要用衛星電話, 如果你想知你將會去既地方電話訊號, 你可以去www.telstra.com.au, 係佢個search欄度打"coverage map", 輸入你去既地方名或者post code, 佢就會有個地圖出黎, 你對番個顏色, 佢就會顯示俾你睇, 係一般3G收到, 定係next g收到, 定係連next g都收唔到要用衛星(衛星先收到其實無辦法).
工作
你想睇本地人對工作既討論可以去whirlpool forums, 揀non-IT果部份.
農工
其實正常本地人都唔會做農工既(當然你要搵就點都有既, 不過"一般來講"無咁解遮), 一般都係背包客先會做. 不過本地係有農業相關既學位可以讀, 內容大概係圍繞氣候、生化同工程.
語言禮貌
語言
語言就唔駛多講, 係以英文為主, 一般來講英文以外既語言係唔需要既, 除非你係專門做翻譯之類, 不過其實係好少, 因為本地人既思維係, 覺得你來得就應該要識英文, 所以又好少專登去學你個語言來為左做你生意(雖然開始有多左大企業想做亞洲人生意, 但普遍來講呢個想法未係非常普及), 所以就算係我來既時候, 係市中心既information櫃位, 的人都係講英文既, 岩岩來既時候當然係聽到一頭霧水啦, 因為唔止係佢地個口音, 而且佢地用既字嚴格來講唔係英文, 係字典上唔會出現既俗語, 好似你同我講既廣東話俗語咁, 字典都係搵唔到的.
對話小貼示: 例如佢地會將australian 講成 aussie, mosquito講成mossie, barbecue - barbie. 如果你聽得明佢的口音而又唔知點解佢地會無啦啦討論食乜既時候講到barbie公仔, 其實佢地好可能係講緊bbq啦. 呢種俗語大概係我地廣東話裡面既著牛記笠記去茶記咁啦, 你知佢講咩就會知, 唔明即管問啦, 岩岩來到唔識佢地的俗語其實好正常既. 如果你地想睇定多的常用俗語可以去youtube, 仲有聲有畫添, 可以容易的習慣口音同俗語.
一個無農場、無摘茄、朝九晚五、有working無holiday既working holiday、非浪遊靚景式既柏斯, 其實係點架呢?..
我同好多人一樣, 都係香港出世, 香港畢業, 然後先過來WORKING HOLIDAY的. 唔同既係, 本身都無諗住周圍走或者環島遊, 由到步至而家, 都係係柏斯駐腳, 做本地人做既工作, 住本地人住既屋, 去本地人去既地方, 我睇既野同發現既野, 都會同backpacker有個不同既角度. 見越來越多香港人過來(我來果時真係一個香港人都無), 就同大家分享下我既個人經歷, 未必岩你用, 但睇下無妨.
有幾篇資訊我幾年前已經貼過, 今次呢個blog係會將佢地分番類, 等大家易睇的 (全文有成萬幾字...), 同時加上2015附註, 更新資訊.
除左柏斯既日常生活對新來的backpackers們可能有少許幫助之外,(無都無辦法) 我同埋我地識得既好多親朋戚友都好中意煮野食(仲係要煮到好撚大茶飯果隻), 同埋我就中意發掘下超市雜貨舖有咩好野, 會分享下, 大家有咩睇岩請出聲, 小弟唔介意入兩箱番香港賺番少少供樓錢既... 但並唔係會全部有得賣, 有的係只係介紹下, 因為可能的野係新鮮食品唔擺得/唔寄得/或者好易碎, 如果大家真係有的野好想要既請盡量發表, 咁我會盡量安排下.
至於層樓供到幾時了, 我又知多少? 寫字樓昨夜又翻風, 故我不敢停手加班中。雕闌露美應猶在, 只是字眼改。問君能有幾多球, 恰似一江春水向地產商流。(浪拍岸, 我仰天長嘯, 意境好高。)
