日常生活-衣食住行玩之- 食 [附2015更新按]－Mr. Roo 袋鼠先生

食

平食

聽聞呢度餐廳貴過東岸好多, 我未去過東岸, 但呢度一般餐廳係貴, 高級餐廳反而唔太貴, 食個麥當勞餐一般都係7-8蚊, 但近來多左好多麥當奴同hungry jacks等做$2 special, $2有個包, 好似$1.5 有細薯條麥樂雞同軟雪糕, 對比番呢度人搵既薪金來講其實呢度麥當奴平過香港.

[2015更新: 一個hungry jacks餐約8-10, 間中有優惠, whopper買一送一但只限單買包,買餐就無得送. KFC有$9.95九件雞(不知是否全部店), $20十件雞連兩個薯條(不在餐牌, 要特別問職員).]

hungry jacks 即係全球所有地方包括香港既burger king. 起初因為版權問題, 原本就有間賣漢堡的叫burger king, 所以遲來的burger king就要改名做hungry jacks 喇. whopper應該即係香港既華堡. 唔記得, 好耐無食過香港的, 香港的burger king係好食的, 幾年前食係好食, 呢度的burger king係唔好食的. 千祈唔好有任何期望.

唯一係呢度既薯條係比香港好食, 因為呢度的人食薯條食到我地香港人食飯咁, 一般我食hungry jacks都會叫果個人即炸薯條俾我, 真係新鮮既薯條係好好食的, 先趁熱食左的真係熱同真係脆既薯條先, 先再食個包. 當然啦, 我次次都會叫佢俾新炸薯條我, 但佢都唔係次次俾我啦, 都會好似香港咁, 未死就當係新鮮咁俾你, 有次仲有個員工係後面大嗌話"全部野都咁新鮮架啦!" 然後當然到手包薯條係只係微暖. 算啦, 無吐啖都算好彩.

fish and chips 食過咁多間都無乜特別, 講真, 我覺得咁多油炸出來既魚唔會有鮮味, 而佢本身都唔係鮮魚係雪魚, 我食過最好食既fish and chips係係灣仔而家fat angelos果個位, 已經執左, 唔係淨係我, 好多朋友不約而同講番都有相同評價.

呢度的人好中意食nandos, 我有香港的空姐朋友都好中意食. 我自己就一般, 你中意可以去試下. menu可以上www.nandos.com.au睇到.

food court 各大商場都有好多food court, 當中一定有香港菜, 好地道的, 因為多數都係香港人主理, 質素就一般都係hea既, 唔好太高期望. 但好多都係俾大中小錢, 然後有個大中小碟, 你可以行一圈去任意裝滿佢. 而我呢的人又好中意用的雞翼既之類去圍大個碟然後再放多的野既...

food court好多香港菜舖頭臨收舖都會平賣飯盒, 你可以買來第日食. 一般來講你食唔晒既野都可以放冰箱, 食晒再叮番, 即係急凍一樣係冰箱你放幾耐都得. 就算pizza/ kfc等食唔晒都可以雪落冰箱, 你放焗爐叮就會脆的. 麵包都可以放冰箱.

車仔麵 - 據我所知, 呢度成個省都唔存在車仔麵的, 請你係香港食埋先來. 未試過既話去灣仔同金鐘交界間車仔麵之家, 好好食的, 尤其當你食過hea的車仔麵, 你就會明白唔hea既車仔麵可以有幾唔hea, 佢唔會俾的比毒藥更無色無味既湯你叫做湯底, 唔會求其搵果的細粒裝唔彈牙又唔入味既魚蛋你叫佢做魚蛋, 湯底濃味, 而且佢係有自製辣醬, 牛腩, 冬菇同雞翼, 都係係hea車仔麵當食唔到的.

佢係後巷的, 請自己搵open rice, 平時夜晚六七點過後唔開, 太遲去都會賣晒冬菇牛腩等好味野, 星期日都唔開.

[2015更新: 剛剛收到消息... 有間叫唔知深夜食堂定咩的, 有賣港式車仔麵、雞翼等, 剛剛見到, 未試過.]

唔平食

sizzlers 你可以點個牛扒或者燒豬筋骨, 然後以前係任食任添的沙律甜品而家聽講變左你可以行一個圈. 咁就唔係好抵了, 亦無左自助餐果種樂趣, 不過食物質素是可以接受的.

hog's breath 如果你真係中意食牛扒, 建議去呢間, 牛扒大件好多, 比起上一間呢間抵好多, 個扒三十幾左右, 加野飲應該四十幾. 如果你要食就揀佢的12定唔知24小時slow cook既扒, slow cook即係類似炆, 好林的, 但如果你星期六日去最好卜定位, 而且遲去既話佢的slow cook扒會賣晒的.

hipo creek 都係食扒的, 質素很好, 唔平.

sawanee (咁上下) 你去google 或者urban spoon search "the best thai in perth" 就係果間, 其他的小型take away店, 泰菜味道都好西化, 得呢間係真係好食. 係正式泰菜類.

你想食特別的泰菜可以去red opium, 裡面好黑的, 營造出一個好似煙霧離曼好似俾人吸毒咁既環境, 好食, 係fusion 式泰菜. 裡面好嘈, 好似酒吧咁, 而且附近真係有好多酒吧.

dragon palace 龍門大酒樓, 可以去飲茶, 食物可以, 價錢正常.