Mr. Roo 袋鼠先生

工作

你想睇本地人對工作既討論可以去whirlpool forums, 揀non-IT果部份.

農工

其實正常本地人都唔會做農工既(當然你要搵就點都有既, 不過"一般來講"無咁解遮), 一般都係背包客先會做. 不過本地係有農業相關既學位可以讀, 內容大概係圍繞氣候、生化同工程.

有朋友係西南部manjimup有酒莊, 佢話其實每到入樽季節都會唔夠人, 都係請backpacker, 工作都係將酒入樽, 應該係最舒服同高薪既農工, 因為係室內既, 而且佢唔會俾的酒熱親, 所以應該會有冷氣, 坐係度入, 可唔可以邊入邊飲就唔知啦~

因為本人其實無做過農工, 我所知既都係呢度本地人以本地人既身份話我知的(例如酒莊主人同釀酒師, 或者牧場主人), 部分係真係來backpack的朋友, 所以可能有其他人可以分享以backpacker角度出發既資料, 我只係分享到以本人地角度出發的.
好多白人既白工都係白人先搵到, 點解呢? 係渠道, 一般澳洲人搵野都係用google, 無人會用yahoo或者其他野的, 而佢地search野都會打英文, 所以佢地去搵backpacker去幫佢地做野, 都會用英文search backpacker 資料, 以forum為例, 只係識英文既奧洲僱主就唔會搵到呢個forum喇, 咁咪搵唔到你囉, 所以佢等人用時你又搵唔到工就咁解.


instead of 背包客棧, 你試下search "backpacking in australia" 等, 你會發現呢個地球唔係淨係得華人會來澳洲backpack的. (我無search過, 只係舉例)

嘗試多的用佢地既角度睇下佢地點搵人, 你就會知點搵工. 農工市區工都係一樣.

市區工

本人一直做既都係市區工, 市區工多數都係上seek搵既, 係www.seek.com.au, 係本地最大既求職網站, 你可以揀番你所屬既地區, 分行業分職業咁搵, 同香港的求職網基本上都係一樣的. 以下既經驗同分享, 有好大部份都係點樣搵一份安安份份留係一個地方既工, 如果你諗住周圍走或者環島遊, 你未必需要睇.

一般來講, 如果你行入一間野, 見好多本地白人, 通常薪酬都唔太差而且唔會太辛苦, 睇裡面既人似唔似係smart既人定係小學都未畢業你就會大概估到佢地要求既程度去到邊. 所以你見就算同樣係零售店, 賣真珠寶既店員其實睇落去係smart過賣珠義盛既店員.

如果你見間店有好多華人, 一般來講都唔會太高薪, 而且要求你做多好多野, 黑工定白工就一間間而定, 如果你想以表面觀察, 就睇下的人有幾smart啦, 其實呢一點都可以標示到好多野.

大型連鎖公司請人一般係網上申請, 所以你就咁行入間舖係無用的, 佢都會叫你番屋企上網申請, 特許經營店除外. 超市收銀員其實要求唔高, 你識唔識講英文都唔太緊要, 不過重點係你要係永久司民(permanent resident/PR), 因為上網申請, 如果你剔個格仔唔係本地人, 相信你都過唔到果一頁, 如果你夾硬剔話自己係本地人, 佢又check唔check你身份我唔敢講每間公司都一樣, 但我相信如果你講野談吐唔似本地人, 甚至唔似係來讀書既話, 其實講兩三句已經知或者你未講野都已經知, 好難呃到人.

麥當奴同kfc呢的其實我唔太清楚, 眼見唔到太多華人做, 可能因為節奏太快, 如果你英文唔夠好其實你做唔來, 表面上好似好容易係香港做到既工作, 其實係呢度未必太容易. 因為drive through位好似話係7秒鐘咁上下要完成好個order. 就算你唔係做落單位, 你煮食位或者pack埋個餐既位一樣要聽得明佢的英文, 而且真係節奏好快, 唔會有人願意請個人返來係咁趕既環境下仲要樣樣慢慢講repeat幾次. 有無唔駛對客位就唔知啦, 大家可以試下, 有時的舖好等人用可能乜人都會請.

邊一的公司你可以試呢? 以下有的建議, 不過呢的公司都唔會想請個人來做三幾個月就走, 所以如果你係打算環島遊或者走來走去的話, 勸你唔好浪費時間而且引地本地人注意有多左backpacker來搵長工然後做幾個月又走, 因為你只係激嬲人, 然後以後來想搵長工既人都會有個難左既起點. 麻煩各位自律.

IGA超市 - 其實係特許經營來的, 唔係一個老闆控制晒咁多間, 所以請人唔係中央統一控制, 你可以逐間問, 一間個老闆唔請可能第間請, 而且有好多iga老闆本身係華人, 呢的未必會上網登, 通常係門口貼張紙, 有時可能想請人但未貼得切, 所以無貼紙你都可以行入去問, 問下唔駛死.

Telstra - 唔講你唔知, 本地人都唔知, telstra係有本店同特許經營店的, 本店都係只請永久居民, 特許經營店就唔一定而且唔經中央請, 邊間係特許經營店就上網應該睇到, 或者佢舖頭門口果的宣傳雜誌有寫的, 佢有個位係寫邊度有分店, 打左*果的就係特許經營. 你識電話科技一定有著數, 唔識都唔緊要, 只要你唔好做幾個月走就得, 個system好很複雜(而家有無進步左唔知啦), train你都要幾個月, 識英文係基本, 唔駛去到莎士比亞級但係唔好太差, 一般要同客人溝通到. 係seek搵. 如果你做得好有些會問你要唔要工作簽証留低的, 但唔係間間會.

一般商場零售店/coffee shop - 呢的零售業尤其飲食業的員工來得快走得仲快, 經常缺人, 睇你個位對唔對客人, 如果你唔駛對客, 唔識英文未必唔請.

搵工小貼示:

重點係如果你想搵份唔太短的工, 你唔可以太似外來人尤其係backpacker, 否則都好難會請. 言行舉止要有咁正常得咁正常, 我諗大家有時係行見到有的人, 未講野都一睇就知佢係香港人, 或者大陸人, 或者日本人, 呢的都係衣著言行舉止, 我地睇到有分別, 人地都睇到的.

如果你去商場洗舖搵工, 著得正經少少, 唔好好似出去行街順便搵工咁, 否則人地會覺得你無誠意同埋唔似本地人, 因為一般本地人都唔會咁做的, 除非你係十四歲去搵份麥當勞工.


一般零售業既工作都係黑衫黑褲黑鞋, 係香港唔需要呢種dress code既工作有好多係呢度都要, 例如剪髮、餐飲食或者時裝店等等, 就算無講明, 一般都係全黑, 有時白恤衫, 但黑褲黑鞋係正路, 而且有好多工的黑褲唔可以係黑牛仔褲, 要係business pants. 如果你無呢的野, 呢邊kmart, bigw, target都有, target最貴, 其次bigw, 最平係kmart但未必有咁齊. 一般返工需要既服裝你都可以係果度買到而且好平, 正常既色會有, 碼都好齊, 平過香港添, 的物料係正常出街grade, 但你唔好期望的西裝係好靚料啦~ 不過絕對著得返一般零售工無問題.

另外你最好印定份cv, 有聯絡電話的, 唔好擺香港個電話落去, 唔會打俾你之餘, 一睇就知你岩岩來而且好新.

如果你諗住搵份唔太短既工, 唔好寫你係working holiday visa, 唔好提, 到你有得見工人地問你先好講, 唔問唔好講. 一般來講, 如果你想搵份長工, 諗下你係香港有咩唔會寫落cv, 呢度其實都係一樣.

唔好寫得太好, 如果你係香港做會計或者律師之類, 來到搵份麥當奴工, 你係唔會搵到的, 除非你寫得好動人, 說服到人點解你會做做下律師來做麥當奴, 否則一般人都會笑完之後掉左你份CV.

唔好寫得太複習, 同香港一樣, 你要有準備有時你份CV唔係經理或者老闆睇, 只係個老闆或者經理叫個秘書去睇, 可能叫佢睇下有無邊一的相關既keyword, 如果個祕書睇唔到, 就會當你無, 咁你就無左份工得好無辜喇.

你既工作經驗唔好寫"work experience", 你可以用"job history", 因為呢度有好多中學以上既學校例如大學或者tafe都會有個必修既無薪實習, 就係叫work experience. 你寫work experience一般人一睇都會係諗起呢種無薪實習, 如果你份cv全部都係無薪既work experience, 人地一係會以為你岩岩畢業無真正出來做過野, 或者知道你係岩岩來而且好新.

到最後如果你有份工真係好想做而且覺得有投資價值你可以自薦無薪工作, 通常係一星期兩三日而且唔係全日. 如果你唔係純粹為錢而真係好想做份工(例如我知有的人真係好想學沖咖啡, 學釀酒等), 或者你覺得佢會俾工作簽証你留低, 但一般麥當勞工作就唔會有人咁做啦.

2015 更新按: 此文於幾年前貼的, 現在更新是:

- 經濟不好、好多生意結業、利率不停跌而且未升過

- 好多礦業主導的工作及衍生工作都數量大減, 繼而薪酬亦大減

- 多過最低工資的工作, 薪酬都比幾年前少, 標準工作時間外的工作都未必有penalty rate(例如星期六日工作), 例如零售、建築等. 應該是合法的, 可能是法律漏洞.

- 現時最低工資為每小時$19.29或每週$656.90, 標準工時為38小時.

- 雖然標準工時為38小時, 但僱主可以係合理範為內要僱員加班, 例如加至40小時等, 而未必會補水的.

- 一般來講, 體力工薪高過office工, 夜班高過日班, 偏遠地區高過市區, 要sell野高過唔駛sell野, 要搵客高過唔駛搵客.

- 好多僱主請慣黑工, 而且還因為請慣而大條道理以為此做法可以接受, 各位打黑工的如果有證明(例如更表等), 可以去fairwork追討原本僱主應付的欠薪!

- 現金支薪並不一定等於黑工, 請各位注意. 只要你薪金是高於最低工資, 而你又有合法簽證, 從事合法工作, 基本上成件事都是合法的, 是白工, 僱主無幫你將薪金自動扣稅, 唔等於你唔駛交稅, 到臨走時先發現自己欠稅局錢會好麻煩. 注意!!

- 唔好留言或者以任何方式問我稅局點知、係唔係真係會捉等呢的問題, 據我知係絕對有人被捉過, 我從來絕對都唔鼓勵任何人犯法, 你惹麻煩之餘亦俾到人個印象"又係你地呢的華人乜乜乜...", 係都要咁做既, 仆街唔好喊.

- 唔好無牌駕駛!!!

 睇完覺得有用又喜歡的話, 麻煩大家到Mr. Roo 袋鼠先生 facebook專頁俾個like, 不定期更新文章及產品將於facebook公佈, 此blog用作文章整理及舊文紀錄.

[ 留言、問題或產品查詢請到 Mr. Roo 袋鼠先生 facebook專頁, 多謝. ]

https://www.facebook.com/pages/Mr-Roo-%E8%A2%8B%E9%BC%A0%E5%85%88%E7%94%9F/732535323558863