本地生活-衣食住行玩之- 住、行 [附2015更新按]－Mr. Roo 袋鼠先生

住、行

我係到步之前係已經上網搵左地方住, 係www.gumtree.com搵, 你揀番perth或者你自己所屬地區先慢慢睇, 你可以跟自己預算搵, 一般$100-$200(每週計). 我當時搵到既係唔駛錢的, 條件係要幫手打掃間屋, 當然其實只係一星期三幾個鐘, 其餘時間你可以照常返放工.

另外亦有朋友搵到免費住宿的, 主要條件都係你係佢唔係屋企既時候幫佢睇住小朋友, 照顧老人家之類. 其實唔難搵的, 據我所知一般香港人或者華人既分租房就好少會有呢的免費機會既, 而且會超多人迫埋一間屋. 而且如果間屋本身無一的傢俬電器既話你都要自己買, 因為大家都係住一陣走, 好少會買好多野係度.

由於當時搵到既呢個免費住宿係由一個本地鬼妹提供既, 而佢又係一個好中意周圍玩周圍識朋友既人, 所以佢都成日帶我去唔同朋友度玩, 識多好多朋友之餘, 你會好快就學到本地人做咩工, 點搵工, 而且有咩係佢地唔做既.

另外除左租金都睇下你住個地方方唔方便, 尤其如果你唔渣車, 就算你睇地圖上近city, 都要睇下其實佢易唔易出街, 因為有的地方係地圖上睇渣車3分鐘就到, 行路其實要半個鐘, 如果無公共交通都好唔方便, 注意有好多地區巴士都係成個鐘先有一班, 所以plan好時間先出門口, 否則你會等成日個鐘都未有車.

請善用google maps, 好多朋友唔知, 其實呢度既google maps係有詳盡既巴士路線同時間表, 手機版都係一樣, 你輸入你要去既目的地既正確位置(即係連埋街號), 輸入你出發個位置, 揀公共交通(佢預設路線係駕車路線), 佢就會列出你搭幾號巴士, 站號係幾多 (棟係地下個條綠色棍) 同埋幾點出發, 你由屋企行幾耐到車站, 架車幾點開出(早幾分鐘, 有時會早, 但一般來講係超準時, 尤其係唔會塞車既地區), 然後轉地鐵搭邊條線去邊個方向等... 如果(通常)你要再轉巴士果架巴士係幾點(因為有時地鐵同巴士班次接得唔好你要等好耐), 係非常仔細而且好update下的. 因為我仲未有車牌所以公共交通係我主腳而且常用google maps.

小貼士:

查google maps時留意站牌號碼, 因為有時同一個位有對面兩邊線係去兩個唔同方向的, 但認站牌號碼就唔會認錯因為每個站牌號都唔一樣的. 呢種情況尤其常見係shopping center, 公園等.

見工或者重要事請預多少少時間!

買張smart rider係比每次買車飛既車費平的, 如果你登記埋自動增值, 個車費就會平25%. 但你唔可以揀concession除非你有本地學生證而且要特別申請一張concession卡, 當你無卡係身既時候去買單程票都唔可以用concession, 捉到會罰錢的.

一般來講, 唔建議入黑之後仲係街度行, 尤其如果你唔係係正city正中間, 一般條街都唔會有人的, 著深色衫褲小心車行過都睇你唔到.