Mr. Roo 袋鼠先生

銀行開戶

又好多人唔知, 其實你可以到步前開戶既, 據我所以hsbc係唔得既, 而且hsbc係呢度唔係主流銀行, 係柏斯既分行係少到離奇, 一般人好少用既, 但當然有的野係hsbc先做到, 有的野都係hsbc較平, 但都有較貴, 如果你有咩問題可以睇佢個網站 www.hsbc.com.au

呢度一般銀行戶口都要俾月費既, 少量唔駛, 唔駛月費既通常係儲蓄戶口, 拎錢出黎要再過戶番去transaction 戶口, 或者你要每個月入錢落去(例如出糧)咁就會免月費.

[2015按: 而家大部份戶口都免月費, 但仍然請留意條件和最低存款要求.]

以我所知主要可以開戶又唔太煩又唔太貴既係westpac, 有種戶口係俾移民用, 你唔駛一定要移民來, 佢主要係俾未到步既人開左個戶口先, 咁你唔駛袋住堆cash穿州過省, 我唔知你地帶幾多錢過來, 但我來果時就帶左唔係好多所以更加唔想唔見既現金, 經馬來西亞再經星加坡咁訓左一晚機場先來到既... 現金係袋住上機落機同係機同訓. 如果我當時知道可以未到步先開戶口我一定會用.

[2015按: 請自行上佢地網站睇下仲有無呢樣野]


費用來講一般係transaction戶口$5一個月(但你每月有二千蚊入落去就免費), 無利息, 儲蓄戶口唔駛月費, 利息介乎2.x% - 4.x%, 浮動息率, 不時會變. 你中意仲可以做7日至幾個月既定期, 利息當然好過香港好多啦. (但7日就無咩息的, 除非你有幾億否則無咩意思.)

如果你未到步或者到步無耐, 可以用移民身份來開戶, 咁頭一年既月費就會免晒. 注意你並唔需要真係移民的, 只要你未到澳洲或者到左無耐就合符資格.

然後你可以有張提款卡但係係master card來既, 你可以當一般信用卡咁全球只要收master card既地方都用到, 當然澳洲以外提款就有另外收費啦. 同埋佢係debit master card, 唔係credit card, 所以你只可以用你戶口裡面有既錢, 唔可以亦唔會欠數的.


如果你唔諗住擺錢落去其實唔駛開定, 來到先開都得.

保險

保險係香港買左先過來, 一來較平, 二來一般都係全球通用, 三來如果你買既保險係保埋flight delay 或者失物既話即係你來果程都受保, 尤其係轉機, 朋友來既時候就行李寄失左, 幾日後先寄番過來, 不過佢份保險唔保, 所以大家睇清楚.

我來果時係無working holiday保既, 我要醫療人壽逐張單分開咁買, 而且保唔到行李航班等(呢的係旅遊保先有), 如果你有working holiday應該好好多, 因為即係你來工作都會受保, 否則你買旅遊保然後來到工作期間受傷可能無得賠或者問你好多野.

呢度睇醫生好貴, 一般睇次傷風感冒好似係$8x, 本地人好似係$6x, 唔記得, 好耐無病, 但岩岩到無耐就大感冒唔睇唔得, 仲要醫藥分家, 所以藥費係再on top 個診金, 如果你有買保險而又受, 睇一兩次醫生都差唔多, 不過睇清楚你份保險賠乜先好買, 一般非working holiday既醫療保險係唔會賠傷風感冒的, 只會賠入院類, 旅遊保可能會賠但可能有墊底費. 自己睇清楚. 我來果時係無wh保的所以唔太清楚, 無野可以推介你.

[2015附加按: working holiday保險條款及受保範圍可能同幾年前寫此文時有出入, 詳情請問香港的現職業內人仕, 本人係唔清楚的.]

如果你想來到先買係可以, 而且仲可以扣稅, 不過價錢比香港高少少, 但賠額都多好多, 同埋你可以買失業保障類既保險, 詳情太複雜, 不建議backpackers買, 如果你是Temporary/bridging居民、剛拿到僱主擔保、基本上是開始會在本地長期生活的才適合.

[2015 附加按+利申: 本人仍然受僱於本地銀行, 但正在放好長好長好長的大假, 對於銀行服務可能唔夠update, 若各位要問, 我會盡量答我知道的、原則上的一般問題, 如有很specific的問題而本人未能解答的, 請見諒.]

睇完覺得有用又喜歡的話, 麻煩大家到Mr. Roo 袋鼠先生 facebook專頁俾個like, 不定期更新文章及產品將於facebook公佈, 此blog用作文章整理及舊文紀錄. 

[ 留言、問題或產品查詢請到 Mr. Roo 袋鼠先生 facebook專頁, 多謝. ]

https://www.facebook.com/pages/Mr-Roo-%E8%A2%8B%E9%BC%A0%E5%85%88%E7%94%9F/732535323558863