語言、禮貌 [附2015更新按]－Mr. Roo 袋鼠先生

語言禮貌

語言

語言就唔駛多講, 係以英文為主, 一般來講英文以外既語言係唔需要既, 除非你係專門做翻譯之類, 不過其實係好少, 因為本地人既思維係, 覺得你來得就應該要識英文, 所以又好少專登去學你個語言來為左做你生意(雖然開始有多左大企業想做亞洲人生意, 但普遍來講呢個想法未係非常普及), 所以就算係我來既時候, 係市中心既information櫃位, 的人都係講英文既, 岩岩來既時候當然係聽到一頭霧水啦, 因為唔止係佢地個口音, 而且佢地用既字嚴格來講唔係英文, 係字典上唔會出現既俗語, 好似你同我講既廣東話俗語咁, 字典都係搵唔到的.

對話小貼示: 例如佢地會將australian 講成 aussie, mosquito講成mossie, barbecue - barbie. 如果你聽得明佢的口音而又唔知點解佢地會無啦啦討論食乜既時候講到barbie公仔, 其實佢地好可能係講緊bbq啦. 呢種俗語大概係我地廣東話裡面既著牛記笠記去茶記咁啦, 你知佢講咩就會知, 唔明即管問啦, 岩岩來到唔識佢地的俗語其實好正常既. 如果你地想睇定多的常用俗語可以去youtube, 仲有聲有畫添, 可以容易的習慣口音同俗語.

禮貌

首先, 麻煩各位中意聽歌既朋友, 唔好去到邊都將你的歌播出黎, 尤其係公眾地方例如公園或者草地或者海灘, 唔知點解我見好多香港人都係咁, 好嘈. 要聽麻煩自己戴耳塞聽, 就算你成班朋友中意聽都唔等於途人都中意聽. 係地鐵都唔好咁, 亦唔好見到本地人係咁你都係咁. 唔好大大聲講電話, 因為本地人咁其實都已經好乞人憎, 通常的人唔敢話佢地遮, 有時會有人話佢的, 俾人話你就唔好啦, 外來人咁做會更乞人憎. 唔該 .

講多幾句thank you或者sorry唔會死人, 落巴士thank司機都唔會死人, 入到舖頭人地同你say hi或者how're you doing唔好好似係香港人地同你講歡迎光臨咁直行直過, 你hi番佢唔會死人. 當你一行入舖頭佢就同你講一大串野你又唔知佢講乜, 多數係同你say個hi, 問有無野可以幫到你, 你可以講hi, how're you doing, i'm just looking. 呢兩句應該解答晒佢可以問你既問題. 走既時候可以講句thank you 拜拜都唔會死人, 特別如果個職員有幫你.

禮貌係好重要既, 而微笑可以避免好多誤會, 我初來澳洲果時, 其實基本上90%既野都聽唔到, 主要因為的人既口音同俗語, 但講係好正常的, 起碼你學左咁多年既英文, 你講其實佢地係聽得明架, 你聽唔到時只要講sorry my english is not very good, could you speak more slowly please? 然後加個非常友善既笑容, 然後佢地就會講慢好多或者淨係講keyword而且唔講俗語版, 咁應該唔太難聽. 重點係好多人包括我自己初來果陣, 因為聽唔明, 自己會tune out左, 然後係個飯枱度人地同你講野會以為佢地同緊自己的朋友講野, 人地問我野無反應之餘仲會人地講講下行左去添... XD 千祈唔好學我咁. 注意有時人地同你講野可能未必睥實你, 而係同其他同枱既朋友講講下其他野講起你嘗試將你融入佢地個對話裡面, 或者係架車度車埋你時不停咁講野, 介紹下風景或者文化等, 千祈唔好因為有其他人係架車度就自動以為佢地唔係同你講野, 緊記聽唔明出聲, 微笑 .

慢慢你就會聽到越來越多, 然後你就會發現佢地既英文根本唔係英文.

對話小貼示:
如果人地問你 do you want some abcxyz?
你唔要既話可以微笑地講 i'm good, thank you
你要既話可以禮貌地講 yes, please. (please係好似我地廣東話講"要丫唔該"既"唔該"咁, 不過係你想要件野又未到手既時候講既, 而且就咁講YES或者OK好似奉旨咁, 有時如果你唔笑睇落就會更加無禮貌)
然後你拎到件野之後先至講 thank you (thank you 係拎到件野之後先講既)
如果你話唔要, 有時人地會禮貌問多你一次are you sure? 咁你可以考慮完一輪之後再答佢.

以上係我岩岩來既時候一個本地市區農夫教我既, 其實就算你講yes thank you 都唔會有人話你, 最緊要你成個態度表現出有禮貌就得, 好少會有人怪你英文唔好的, 我岩岩來的時候聽唔到90%, 微笑只不過找少好多麻煩咁解唧.

另外如果你係party或者同朋友食飯既時候, 一般本地人來講, 如果係人地屋企bbq, 主人家通常會提供腸仔同麵包, 一般係你自己帶野飲(除非主人家特別講明佢會提供啤酒), 唔好自己走去拎晒人地的酒來飲, 因為呢度的酒係離奇咁貴, 所以一般去人地屋企bbq party係自己帶自己酒. 如果係新識你又想有個好印象, 可以買支香檳或者白酒或者半打啤酒去俾主人家, 香檳來講十零蚊有交易, 白酒較普遍, 十蚊樓下都有, 半打啤酒最貴. 唔係必要的, 唔係人人帶, 但禮多人不怪, 睇你有幾多錢係身. 有時主人家見你無帶野飲或者唔知要帶野飲都會問你要唔要, 如果唔熟果的我一般都會唔要既, 因為有時人地只係禮貌上問下, 唔係真係想俾你, 但澳洲人比香港人坦誠, 如果唔想俾你都未必會問你, 當然都睇果個人有幾坦誠幾有禮貌或者你同佢有幾熟啦, 如果你真係想飲就講聲thank you啦, 盡量唔好豪劈人地的酒, 如果你好快飲晒人地又再問, 你又想飲又想懶有禮貌, 可以用我呢招, 就係扮晒野咁問下你會唔會飲晒佢的啤酒架, 咁佢梗係話梗係唔會啦唔好客氣, 咁你又有多支啤酒喇~ 我估佢唔會因為你飲左佢一兩支啤酒而憎你一世既~ 記住多謝人呀!~